Te Whanganui-a-Tara 15 Oketopa 2020: Mai i Hūrae 2020, kua waitaohua e BCITO e 5648 piatanga hou, e whakaritea ana tērā ki ngā mea 2,200 mō te wā ōrite i tērā tau. Kua rēhita hoki e ia tōna 1,200 kaitukumahi hou hei whakangungu pia i te tau 2020.
“Ka nui te pai kia kite i te tokomaha e hiahia ana ki te whai piatanga. Inā kē ngā huarahi e tuwhera ana ki te hunga ringarehe, ka utua koe, i a koe e ako haere ana, he kaupapa utu kore, ā, he rāngai tino whaitake anō tēnei hei whakahoki mai i te ōhanga o Aotearoa,” te kī a Warwick Quinn, BCITO Kaiwhakahaere Mātāmua
E hua mai ana tēnei pikinga ake o te tokomaha i tā te kāwanatanga tautoko ki ngā ringarehe me te whakangungu.
“He 19% te nui ake o ngā pia e whakangungua ana i ngā marama e iwa o tēnei tau i ērā mō te katoa o 2019. Ahakoa kei te marama o Oketopa, kua tata rite te maha o ngā kaitukumahi hou ki ērā mō te katoa o 2019 – mai i te Hūrae ki Hepetema, e 62% o ngā kaitukumahi kātahi anō ka hono mai, kua hoki mai rānei ki te whakangungu.
“Hei tohu mai tēnei nā ngā kaupapa Whakapiki Piatanga me te Utu Kore a te Kāwantanga i uru tika ai te tokomaha atu o ngā tāngata ki ngā ringarehe, me ngā kaitukumahi kia whakangungua. He rongo pai tēnei rongo mō te rāngai nei kua raru i runga i te iti haere o ngā pūkenga.”
I pānuitia te Kete Whakangungu Ringarehe, Piatanga hoki $1.6 piriona i roto i te Pūtea 2020 i te marama o Mei, hei haumi nui mō ngā mahi me te whakangungu hei mea hāpai i a Aotearoa hei whai atu i te rāhui nui o COVID-19.
Ko ētahi o ngā pia nei kei te uru atu ki ngā ringarehe hei ara mahi tuarua. “Kei te kite mātou i te hunga e uru mai ana i ērā ahumahi kua rongo i ngā pānga mai o COVID-19, pērā i te hokohoko me te manaakitanga.
“Ko te hanga whare me te hanganga tētahi rāngai kei te piki haere tonu ahakoa ngā āhuatanga o te wā. Ka nui tonu ngā whakaaetanga hanga whare whai muri i te rāhui nui, me tā te kāwanatanga tautoko ki ētahi kaupapa hanganga, e kore pea e mimiti te hiahia ki ngā tāngata pūkenga hai kaimahi. I ngā piki me ngā heke o ēnei wā ko te mahi ringarehe he pou whakawhirinaki mō te tangata.” Hei tā Quinn.
Ko Haylee Lemon, he kaimahi kei Kevin Goodall Builders i Tāmaki Makaurau, tētahi o ngā pia hou o BCITO. I muri i tana putanga i tētahi kura tuarua e aronui ana ki ngā ara whare wānanga, ka haere a Haylee ki te mahi, ā, ka whiwhi mahi ia ki Bunnings. I reira ka tūtaki ia ki tana kaitukumahi o tēnei wā.
“Mai rā anō e kaingākau ana au ki ngā ringarehe, nā, ka tuku mahi mai a Kevin ki au, i whakaae tonu atu au. I tīmata au ki te mahi i te marama o Mei, nō te Hūrae i tīmata taku piatanga kāmura. He rawe ki au tēnei mahi, ā, kei te anga whakamua au ki taku ara mahi hou i roto i te hanganga,” tana kī.
I tēnei wā 15,400 ngā pia a BCITO e whakangungu ana.
ENDS
Ngā tino tatauranga BCITO
- Te katoa o ngā pia – 2019 (i 31 Tihema) 12,800; 2020 (ki tēnei wā) 15,400
- E 8,500 ngā pia kua waitohua e BCITO i 2020
- 17% te pikinga ake mō te Mahi Kāmura i tērā mō 2019
- 33% te pikinga ake mō te Mahi Peita me te Whakarākai i tērā mō 2019
- T61% te pikinga ake mō te Ringarehe Pani Whāpiri i tērā mō 2019
Mō ētahi atu kōrero, whakapā atu ki Kiri Shannon, Acumen Republic mō te taha ki BCITO +64 21 0234 4157.