Pērā i te nuinga o ngā tāngata, kua whai te Pūtahi nei ki ētahi tikanga mahi hou.
Tēnā koutou
Pērā i te nuinga o ngā tāngata, kua whai te Pūtahi nei ki ētahi tikanga mahi hou. Nā ngā hangarau hou i taea ai, ā, pērā tonu ki a koutou he akoranga hou, he pikinga anō, heoi, ko te mea nui kei te koke whakamua tonu.
I tēnei ata, i tū te hui ā-ipurangi tuarua a te Kaunihera NZIST mō tēnei marama. Ko ngā tino take i kōrerotia ko ēnei; ko te āhua o ngā wero kua pā ki te motu; me pēhea te kōtuinga o NZIST e āwhina ai ina ka puta atu tātou i te herenga nui. Kua whakaritea he wā kia āta tirohia tēnei take inā rā koia tonu te kaupapa nui mā tātou katoa me tō tātou whenua.
I hui anō mātou me ngā kaiwhakahaere mātāmua katoa i tēnei rā ki te whakawhiti kōrero mō aua take anō. Ka puta ake he whakaaro pai, whakaaro hou mō te tautoko i ngā tauira me ngā kaitukumahi i te wā o te herenga nui, me te whakarite kia pai ake te whai wāhi ki ngā akoranga me ngā kaupapa whakangungu mā ngā tauira tērā pea kāore e taea e rātou te ako tuihono.
He rā nui ēnei rangi ruarua nei, mō mātou me ngā kaimahi katoa puta noa i te kōtuinga NZIST, me te arotahi tonu ki te whakarite huarahi rerekē hei tuku akoranga. Kei te mahi tonu te tari ā-motu ki tā te Pūtahi rautaki me tana mahere mō ngā rā kei te tū mai, ā, kei te arotahi hoki ki te whakamahi i ngā mātauranga me ngā mōhiotanga kei te kōtuinga nei kia haere whakamua ai tātou. Nā te Covid-19 i tino kite ai mātou me titiro anō ki ngā whāinga, ki ngā huarahi ako hou hei painga anō mō te katoa, arā, ngā tāngata, ngā kaitukumahi me te hapori whānui. Kei te mau tonu tātou ki tēnei whāinga.
Nā reira, kia pai, kia haumaru te noho i te wā o te Aranga. Mōhio tonu au ehara tēnei i te Aranga i whakaarohia, heoi, ahakoa kei hea koe i roto i tō mirumiru, kia mōhio rā kei te āta tiakina koe, ā, me whakarite wā whakatā mōu, kia tā ai te manawa, kia hauora anō ai i te taha o te whānau (kei roto i tō mirumiru, kei ngā ara tuihono rānei!)
Ka kite anō
Chris Collins
Kaiwhakahaere Mātāmua mō tēnei wā