I tēnei rā e pānuitia ana e te Poari Mātāmua o te New Zealand Institute of Skills and Technology ngā kaiwhakahaere mō ngā poari o ngā āpitihanga Pūtahi, Kuratini hoki (ITP) i mana ai i te 1 o Paengawhāwhā 2020.
Kua whakaae mai ngā tāngata e whai ake nei kia noho hei kaiwhakahaere ki te poari o UCOL atu i te 1 o Paengawhāwhā 2020:
Steve Maharey – Heamana
Verne Atmore (Ngāti Kahungunu, Ngāi Tahu)
Mark Cleaver
Katarina Hina (Ngā Wairiki, Ngāti Apa, Te Atihaunui a Pāpārangi, Ngāti Porou)
Lorraine Stephenson (Rangitane, Ngāti Kahungunu)
Linda Stewart
“Ko te kopounga o tēnei o ngā Poari Kaiwhakahaere tētahi o ngā mahi nui hei wāihanga i tētahi pūnaha ahumahinga piritahi, mauroa hoki,” ki tā Barry Jordan, te Heamana o te Poari Mātāmua.
“Ko te korounga ia mā ēnei kopounga e taurite ai te taha whakahaere me te taha ki ngā hononga taketake ā-rohe, ā-hapori hoki. E manawareka ana mātou i te momo o te tangata me ngā tirohanga rerekē kei ia poari, otirā ngā pūkenga me ngā tautōhito hei whakatinana i ngā hua pai mō ōna hapori, mō ōna hapori.”
Ko te hiahia o te Education (Vocational Education and Training Reform) Amendment Act ko te iti rawa kia tokowhā, engari kia kaua e nui atu i te tokowaru ngā kaiwhakahaere mō te poari tuatahi o ia āpitihanga ITP, ā, ko tētahi haurua o aua kaiwhakahaere me mātua noho ki roto i te rohe e ratoa ana e taua āpitihanga.
E kī ana te Heamana o UCOL Poari, a Steve Maharey, “Ko te anamata o ngā rohe, o Aotearoa hoki ka tau i runga i ngā pūkenga o ōna tāngata. Inā kē te pai o UCOL i roto i ngā tau mō te whakaputa tāura mātāhō, ā, kua whai koha nui ki te ōhanga o Aotearoa.
I tēnei wā me tōna tirohanga hou mō te mātauranga ahumahinga, ka anga whakamua nei ahau me te hiahia kia kaha ake te mahitahi me ngā ahumahi, ngā iwi me ērā atu pūtahi o te rohe e mātua whakatipu ai ngā tāngata ringarehe, pūkenga hei oranga mō Aotearoa.”
He ārahi haere i te nekehanga atu i te wairua o te whakataetae ki tērā o te kōtuituinga tuku ratonga ki tēnā, ki tēnā rohe, kua whakataungia e te Poari Whakapūmau kia noho tētahi mema o Kaunihera NZIST hei kaiwhakahaere ki ia poari āpitihanga ITP. Tērā e whiwhi ia poari tētahi tangata hei ‘kopounga Poari rua’. Ka whakataungia ēnei ingoa i te marama o Paengawhāwhā.
Mō te kopou kaiwhakahaere i whai te Poari Whakapūmau i tā te Treasury anga kopounga kaiwhakahaere ki ngā poari o ngā kamupene Karauna. Neke atu i te 370 ngā tono i tae mai i waenga i te wā o te Kirihimete me te huringa o te Tau Hou.
Katoa ngā kopounga ki ngā poari āpitihanga i whakamanahia e te kaunihera NZIST i te 1 Paengawhāwhā 2020. Ka whakamanahia ngā mema o tēnei Kaunihera e te Minita Mātauranga, e Hon Chris Hipkins, i mua i te mutunga o Poutūterangi.
Steve Maharey – Heamana
E noho ana a Steve hei Kaiwhakahaere ki te maha o ngā whakahaere pērā i Pharmac, Education New Zealand, Te Manatū Haora me WellingtonNZ.
Ko ia te Tumuaki o Te Kunenga ki Pūrehuaroa i Papaiōea, ki Te Whanganui a Tara, ki Te Raki Pae Whenua, Tāmaki Makaurau mai i 2008-2016. Mai i 1990 tae rā anō ki 2008 ko ia te Mema Pāremata
Mō Pāmutana ki te Raki, ā he Minita Mātāmua hoki ia i te Rūnanga Whāiti, me tana kawe i te whānuitanga o ngā kaupapa pērā i te Mātauranga, te Tukumahi, me te Rangahau, te Pūtaiao me te Hangarau, mai i 1999 ki 2008.
I ngā tau ki mua he Pūkenga Matua ia mō te Mātauranga Hāpori, he Pūkenga Taina hoki mō ngā Akoranga Pakihi. I noho hoki ia ki te Kaunihera o te Tāone o Pāmutana mai i 1986 ki 1989. Nō te tau 2008 i whakawhiwhia ia ki te Companion of New Zealand Medal (CNZM).
Verne Atmore
Ko Ngāti Kahungunu me Ngāi Tahu ngā iwi o Verne. Neke atu i te 20 tau a ia e kawe ana i ngā tūranga kaiwhakahaere matua i te rāngai tūmataiti, ā, i tēnei wā koia te Perehitini Tuarua (VP) mō Livestock Management Solutions i Datamars SA. I mua i tērā, i mahi a Verne hei Kaiwhakahaere Matua i Aotearoa mō Tru-Test Group, hei Kaiwhakahaere mō te Rōpū Tauhokohoko - Gallagher Group, hei Kaiwhakahaere Matua mo te Hoko AsiaPac-Gallagher Security Management, hei Kaiwhakahaere Mātāmua mō Farmworks Precision Farming Systems.
He mema Kaunihera o mua a Verne i UCOL, ko ia hoki te Heamana o te Komiti Tātari Kaute me te Tūpono o te Raru ka Pā Mai, ā, i noho hoki ia hei Kaiwhakahaere mō te kamupene āpitihanga o Datamars, AgTrac Services Ltd. Kua mārena a Verne me ngā tamariki e 3, he tāura ia o te Whare Wānaka o Aoraki, kei Manawatu ia e noho ana.
Mark Cleaver
Kua noho a Mark ki te rohe o Manawatū mō ngā tau e 23. I Te Kunenga ki Pūrehuroa ia mō ngā tau e iwa, ā, ko ia te Kaiwhakahaere o te Tari Rangahau me te upoko o te Whakawhanake Pakihi me te Taha Arumoni, ā, i tēnei wā ko ia te Kaiwhakahaere Mātāmua o Massey Ventures Ltd, he pakihi arumoni me te haumi ohu.
E kaingākau ana a Mark ki te rangahau me te auahatanga, ā, nāna anō i āwhina kia whakatūria te maha o ngā kamupene hou ko te hangarau te pūtake, me te whakaara i tāna ake pakihi, Aero Sports Protection Ltd. He kaiwhakahaere a Mark mō ētahi kamupene arumoni, ngā whakahaere hākinakina me ētahi tarati arumoni-kore, mō ngā 20 tau neke atu.
Katarina Hina
Ko Ngā Wairiki, Ngāti Apa, Te Atihaunui a Pāpārangi, me Ngāti Porou ngā iwi o Katarina. Neke atu i te 20 tau ia e mahi ana i roto i te mātauranga matua me ngā kaupapa mātauranga ā-iwi, ā, mai i te tau 1996 kua noho ia ki Whanganui. Nō nātata nei i kopoua ia hei Kaiārahi Rautaki mō Te Rūnanga o Ngā Wairiki – Ngāti Apa, ā, ko tāna he whakatipu, he whakapūmau hoki i ngā ratonga pāpori i Tūtaenui.
Kua noho hoki a Katarina hei kanohi mō ōna iwi i runga i ngā poari me ngā komiti mātauranga matua, ā, he tautōhito hoki ia mō te whakawhanake i te pūnaha mātauranga matua, te whakaū i te kounga me te whakawhanake marautanga, te whakatau whāinga rautaki, whāinga whakahaere hoki me ngā āheinga ahurea.
Lorraine Stephenson
Kāore āno ki awātea mai.
Linda Stewart
Hai Kaiwhakahaere Mātāmua mō te Central Economic Development Agency, e ārahi ana a Linda i tētahi tīma e arotahi ana ki te tōnuitanga ā-ōhanga mō Manawatū mā te poapoa haumi mai, te whakawhānui me te whakapūmai i te pakihi, te waihanga me te whakatipu i te puna pūmanawa, pūkenga hoki e mauroa ai, me te whakaatu i ngā tino āhuatanga o te rohe hei poapoa mai i te tangata, ngā pakihi me te haumi.
Taketake mai ana a Linda i te whanaketanga pakihi, te whakahaere kaupapa me te kimi kaimahi mō ngā whakahaere pērā i Mars Inc., Virgin Australia, Te Kunenga ki Pūrehuroa, Te Whare Wānaka o Aoraki, me te Primary ITO, ka mutu he tautōhito ia ki te taha arumoni, me te rāngai mātauranga hoki.
I tēnei wā kei te noho a Linda ki te Poari Whakawhanake Ohanga o Aotearoa, ā, e ngākaunui ana ia ki te whanaketanga o Aotearoa hei painga, hei oranga mō te katoa.