Kua oti tētahi mahere hao nui te whakatakoto hei waihanga i tētahi Pūtahi ā-Motu hou (IST), hei taupunga mō te pūnaha mātauranga ahumahinga hou me tētahi o ngā hurihanga nui e whitu o te Whakahoutanga o te Mātauranga Ahumahinga (RoVE).
He aha ngā mahi?
Me whai tūāpapa pakari te Pūtahi ā-motu, ka tika, mā reira e taea e te Kaunihera te waihanga i ōna wāhanga anō. E rua ngā tino wāhanga o tēnei mahi.
Ka oti ngā mahi whakakaupapa tekau ā te 1 o Paengawhāwhā 2020. E kapi ana i ēnei ngā mea tino whaitake kia mahia ina ka mana te ture kia puta te Pūtahi hou hei kamupene matua me ngā Kuaratini 16 (ITP) hei āpititanga ōna. Ko tētahi aronga o tēnei mai he mātua whakarite kia haere tonu ngā whakaakoranga mō ngā tauira, ngā kaimahi me ngā ahumahi i a tātou ka whakawhiti ki te kaupapa hou.
Ko ngā mahi anamata e whitu kei te roto i ngā ringaringa o ngā ohu kaiwhaipānga, mā rātou e tirotiro ngā pūkenga me ngā āheinga e tika ana mō te Pūtahi hei waihanga i te ao ako hou. Kei roto i ēnei kō te ara haere o te tauira, te whakarite i te ako ā-wāhi-mahi, te tuku akoranga tuihono me te mātauranga ā-ao whānui. Ka haere tonu ēnei mahi ki tua i te 1 o Paengawhāwhā 2020.
Ko ētahi tutukitanga whakahirahira ko te kopounga o te kaiwhakahaere mātāmua, te whakatuwheratanga o te tukanga tono a-rohe mō te wāhi e tū ai te tari matua o IST me te tīmata i te tukanga kimi tangata hei kaiwhakahaere mō ngā poari āpiti ka riro ko rātou hei kaitiaki i ngā āpititanga ITP atu i te 1 o Paengawhāwhā 2020.
Ko wai mā e whai wāhi mai ana?
E tautokongia ana te Poari Whakawhāriki IST e te Uepū Whakawhāriki IST, he tīma iti tēnei kei te arahina e te Kaiwhakahaere Matua e Murray Strong. E whakapau kaha ana te tīma nei kia mātua whakarite ngā manga mahi 17 i ētahi otinga pai ake mō ngā tauira, ngā kaitukumahi, ngā kaimahi, me ngā hapori.
I te marama o Mahuru i tukua te reo karanga ki te rāngai whānui kia whakaingoatia he tāngata e whai wāhi mai ki ngā ohu mahi e whitu. Mai i ngā whakaingoatanga 500, e 76 ngā kaiwhaipānga i kōwhiria. Kei ia rōpū tētahi māngai mō te Poari Whakawhāriki IST, tōna kaiwharite mai i te rāngai tonu, me tētahi kaitohutohu matua e hono ana ki te Uepū Whakawhāriki IST hei mea tautoko.
Nā ia rōpū anō tāna ake tirohanga i tautohu, ā, kei te mahitahi rātou ki te whakaoti whakatau hei kete rauemi mō te Kaunihera hou o te Pūtahi hou.
Kei hea ēnei mahi e mahia ana?
Kei Ōtautahi kei tētahi tari mahitahi te Uepū Whakawhāriki IST, engāri anō ngā kaimahi me ngā mema poari kei ngā wāhi katoa o Aotearoa e hora ana, kei te mahia ngā mahi i tēnā, i tēnā wāhi kei reira ngā tāngata e noho ana, i runga anō i ngā hangarau tuihono, mahitahi hoki.
Tētahi kaupapa o ngā mahi takatū a te Poari Whakawhāriki IST ko te kōwhiri i te wāhi e tū ai te tari matua o te Pūtahi ā-motu, I te 6 o Hakihea i whakarewatia te tukanga tono i runga i te Ratonga Tono Hiko a te Kāwanatanga (GETS). Mā te pērā ka tuwhera, ka mārama hoki te tukanga nei.
E taurite ai ngā hiahia o tētahi pūnaha tūhonohono ā-motu me ērā o ngā rohe me ngā hapori, i whakatauria e te Rūnanga Whāiti o te Kāwanatanga, hāunga ko Tamaki Makaurau me Te Whanganui-a-Tara, me noho tuwhera tēnei tukanga ki ngā rohe katoa. E ai ki ngā ritenga o te tūtohinga hukihuki me tuku e te Pūtahi ki ia rohe ngā momo whakaakoranga mātauranga, whakangungu hoki, i te wāhi-mahi, i roto tonu i te mahi, kanohi ki te kanohi me te ako tawhiti.
He pēhea te kawe o tēnei mahi ?
He nui anō ngā wāhanga o tēnei mahi, ā, kei te haere whakamua ngā mahi i runga i te wairua mahitahi puta noa i te rāngai kia oti i roto i te wā tika i kōrerotia i tā te Minita Reta me onā Hiahiatanga.
E manawanui ana te Poari me te Uepū Whakawhāriki IST ki te hāpai i ngā mātāpono o te Tiriti o Waitangi ā, kei rapu tautoko, tohutohu hoki kia mātua whakarite kia kitea tonutia ēnei mātāpono i ōna whakaaro, i āna mahi anō hoki.
He aha i pēnei ai te mahi?
Inā tonu te kōpaka o ngā pūkenga kei ngā rāngai ahumahi, ā, kāore te pūnaha o nāianei e whakatutuki ana i ngā hiahia o te katoa o ngā kaitukumahi, ā, hei ngā tau kei te heke mai ki te waiho kia pērā tonu ka kino kē atu tēnei āhuatanga. Nā konei me whakarite panoni māia tonu puta noa i te rāngai mātauranga ahumahinga kia ū tonu ki ngā hiahia o te ao mahi horo te whanake.
Ko ngā tauira, ngā kaitukumahi me ngā hapori te pūtake tonu o tēnei Whakahoutanga. Ko ngā mahi a te Pūtahi ā-motu hou ka whakahaeretia i runga i te hiahia ki te tuku kounga, ōritenga, whai wāhitanga me te nekenekehanga mō ēnei tāngata katoa.
Ā te 1 o Paengawhāwhā, mō te wā tuatahi rawa i roto i te hītori o te mātauranga ahumahinga, katoa ngā Kuratini 16 ka neke atu i te taiao whakataetae, ki te taiao mahitahi.
Waihoki he wā tuatahi anō tēnei kia tīmata i tētahi kōtuitui ā-motu hei whakarite i te āheinga ki te tautoko i ngā whakaakoranga ā-wāhi-mahi, ā-kaituku akoranga, me te ako tuihono hei pūnaha kotahi. Mā te pūnaha nei e tuku ngā huarahi ki te mahi kia hāngai, kia rite ki ngā hiahia o ngā ahumahi ahakoa ka panoni haere aua hiahia i roto i te huringa o te wā.
Puta noa i te motu, ko tōna 240,000 tāngata e whai wāhi ana ki ngā tū whakangungu ahumahinga. He hīkoi roa tēnei hīkoi kia whakawhiti tātou ki tētahi Pūtahi ā-motu tōtika. Mā te tūāpapa pakari e tū tōtika ai te whare – koia tonu te mahi e mahia ana i tēnei wā.
Ko te tuhinga e whai ake nei i whakaputahia i te pānui whakamutunga mō 2019 o RoVE, hei whakamārama i ā mātou mahi.