I te Wenerei 29 o Hūrae 2020, kātahi anō ka hui kanohi-ki-te-kanohi ngā heamana o ngā Āpitihanga NZIST 16. Ko te tikanga ka tū tēnei hui tuatahi i mua engari nā te Rāhui nui o COVID-19 i hīkina ki te marama o Hūrae.
I whakahaeretia te hui nei e te Heamana Kaunihera NZIST a Murray Strong me te Heamana Kaunihera Tuarua a Kim Ngarimu me ngā Mema Kaunihera NZIST a Tania Hodges, rātou ko Sam Huggard, ko Peter Winder.
Nā Murray te rōpū i whakatau me tana mihi anō i te mea kātahi anō rātou ka whai wā ki te huitahi, kanohi-ki-te-kanohi. I whakamōhiotia e Murrary a Stephen Town te Kaiwhakahaere Mātāmua tuatahi ki te rōpū me te kī ahakoa e toru wiki me te hāwhe noa iho te roa o te noho a Stephen ki tana tūranga hou, inā ke ngā mahi kua oti i rātou ko tana rōpū iti anō.
Ko te nuinga o ā Stephen kōrero i aro ki te huarahi whakawhiti, me tana kī he mahi nui tonu te whakaumu i te kōtuinga, kia whakakotahi ai te tuku mātauranga ahumahinga me te whakangungu i te wāhi mahi, i te kura, ā tuihono hoki mā tētahi kōtuinga kotahi, mauroa hoki ki tēnā, ki tēnā rohe.
Ko ngā mahi matua e toru ka whāia i tēnei wā hei whakakaupapa i te whakaumutanga nei, ko te whakarite tono hei whakawhanake i tētahi rautaki whakahaere hautaonga, hanganga hoki; te whanake mahere rautaki pūnaha pārongo me te rapu hoa hei waihanga i tā NZIST tauira whakahaere. Ka haere ngātahi tēnei mahi me tā te Kaunihera mahi hei whakaū i ngā momo tuhinga kawenga takohanga me te whakawhāiti mai ki ngā take rautaki o te wā whakawhiti ki te mutunga o te tau 2022 me te ahunga whāinga roa o NZIST.
Ko tēnei huarahi kei te takahia e NZIST hei whakapohewa i te ako ahumahinga he kōtuku rerenga tahi tōna rite, ā, ka tukua e te pūnaha whakahaere he huarahi hei waihanga i tētahi pūnaha mārama, ngāwari hoki te whai, e aronui ana ki ngā hiahia o ngā ākonga me ngā kaitukumahi, he whakarato hoki i te whai wāhitanga me te whiwhinga ōrite mō ngā ākonga katoa, engari he mea ngāwari tonu e taea te panoni i roto i te huringa o te wā. Mā konei e āwhinatia ai ngā tāngata o Aotearoa kia tipu ora i ngā mahi hei nngā rā ki tua.
Ko te tauira whakahaere whakamutunga tērā ka whakaotia i roto i te iwa marama, ā, he tauira mō te rāngai, nā te rāngai anō i hoahoa, me te whakanoho ko ākonga te tino pūtake.
I hono atu te Minita Mātauranga Chris Hipkins ki te hui mā Zoom. E 30 meneti ia i reira e kōrero ana me te rōpū mo te kaupapa whakahoutanga ahumahinga me ngā huarahi hirahira, ongaonga hoki e tuwhera atu ana me te wāhi o NZIST ki taua kaupapa nui. I kōrero hoki ia mō tāna i hiahia ai kia kitea ake ngā mahi pai o tēnā, o tēnā, kia haere ko te mahitahi, kaua ko te wairua whakataetae. I whakaae tonu ia me whai kia rerekē ngā mahi, ā, ka riro mā NZIST e whakarite te tauira whakahaere e ngāwari ai te whakawhiti mā ngā ākonga puta noa i te kōtuinga, e whakahaeretia hei muinga mō ngā kaitukumahi, kia auaha, kia urutau hoki hei whakatutuki i ngā matea hurihuri a te ohumahi.
I kōrero hoki a Gillia Dudgeon, te Kaiwhakahaere Mātāmua Tuarua Whakaratonga ki te rōpū mō ngā pūtea me te aroturuki, hei tīpako i tā NZIST kawenga i roto i te pūnaha.
Ko ētahi atu take i matapakihia ko te mātauranga ā-ao me te pānga mai o COVID-19, ngā whakaurunga i Aotearoa nei, ngā whakarite kia uru mai ngā ITO Whakawhiti ki te kōtuinga, te hononga o NZIST me te kaupapa whānui o RoVE tae atu ki ngā RSLG me ngā WDC me te pūnahi tuku pūtea kotahi. Tērā anō he matapaki tino whaitake mō te panoni ahurea e hiahiatia ana puta noa i te kōtuinga hei tautoko i taua whakawhitinga me te wāhi ki ngā Heamana ki taua kaupapa, i matapaki hoki te rōpū i ngā mahi oti-wawe hei para i te huarahi i te taha o nga mahi whanake tauira whakahaere a NZIST.
Tērā tonu pea ka tū te hui tuarua a ngā Heamana Āpitihanga NZIST ā te marama o Oketopa.