Kei te whakariterite i ngā tikanga hei whakauru, whakawhiti hoki i ngā ITO

Ko tētahi wāhanga o te whakahou i te mātauranga ahumahinga, ko te hiki atu i te haepapa mō te whakarite paerewa ki ngā Workforce Development Councils . Ka riro mā NZIST me ētahi kaituku mātauranga matua te mahi whakangungu e whakarite. Ko tētahi wāhanga tino whaitake o tēnei mahi ko te mātua whakarite ko ngā ākonga, ngā pia me ngā kaitukumahi te tino pūtake o ngā whakatau.

Nā runga i te hononga tata i waenga i ngā ITO, te kaupapa RoVE me TEC ka noho tonu ngā āhuatanga o te mahitahi me ngā hoa hei tino take mō tēnei kaupapa e haere ake nei.

Kua tonoa a Fiona Kingsford, Kaiwhakahaere Mātāmua o Competenz  ITO, kia mahi ki NZIST hei kaimahi wāpoto hei āwhina i ngā mahi hei whakaoti i te mahere whakarite kia ngāwari ai te whakawhiti a te whakangungu ahumahi, kia mātua whai ngā ākonga me ngā kaitukumahi i te tautoko e tika ana mō rātou.

“E tino hari ana au ki te mahitahi me ōku hoa whakawhiti ITO, ki te whakarite huarahi tika mō te hunga ākonga me ngā kaitukumahi. Mōhio tonu au ko tēnei mea te whakawhiti he mea whakapōrearea, whakahārangi hoki mō te rāngai whakangungu ahumahi, i roto hoki i tēnei wā o te urutā COVID-19, me hoe tahi tātou ka tika. Mā tātou tahi e whakarite, e whakatau hoki te huarahi hei whakawhānui i te mātauranga ahumahinga ki te haerenga o te ako tūroa tonu e taea te tuku i te kura tonu, ā-tuihono, i te wāhi mahi rānei, ā, i te mutunga iho, he whakapiki pūkenga whakaputanga,” te kī a Fiona.

“E whai ana mātou ki te tautuhi tikanga mō tēnei wā hei tirohanga mā ia ITO. He hurihanga nui tēnei mō te rāngai katoa, ā, e tino kaingākau ana ahau ki te kimi rongoā hei whakamātau, hei whakarite hoki, kia tōtika ai mō te katoa. Ko riro mā tātou e whakahou i te rāngai mārauranga ahumahinga, nā runga i tērā me rerekē te ahua o ngā mahi.” te kī a Fiona.

Hei ngā marama 12-18 e haere ake nei, ka mahitahi te NZIST me ngā ITO whakawhiti, ngā āpitihanga NZIST, te hunga ākonga, ngā kaitukumahi me ngā hapori ki te whakarite i tētahi mahere whakauruuru mō te mātauranga ahumahinga. Ko te otinga o tēnei mahi ka whakahuihuitia ki tā NZIST tauira whakahaere – arā, ko te mahere hei whakaumu i ngā tauira whakaakoranga a NZIST.

Ko te whakawhiti ngāwari o ngā tikanga whakangungu mai i ngā ITO tētahi whāinga tino whaitake o NZIST, ā, nāna i whakatū tētahi rōpū mahi hei tautoko i a Fiona. Mā te Hemana Kaunihera a Murray Strong rātou ko ngā mema Kaunihera ko Peter Winder ko John Brockie e tirotiro te rōpū. Ka mahitahi a Stephen Town, Kaiwhakahaere Mātamua rāua ko Alex Cabrera, te Kaiwhakahaere Mātāmua Tuarua whakakapi mō te Whakaumutanga, me Fiona. Ko te hiahia o te rōpū ia kia oti tētahi mahere whakahaere i a rātou i mua i te mutunga o te tau.