Hei tā Stephen Town, Kaiwhakahaere Mātāmua o Te Pūkenga, he mea tino whaihua ngā putanga o te uiuinga ki te tīma kaiarataki a Te Pūkenga, me ngā tīma āpitihanga puta noa i te kōtuinga.
“Kei te tirotiro mātou katoa i ēnei raraunga, me te whakawhiti kōrero mō ngā mea me mātua whai kia pai ake, kia rerekē te mahi, me pēhea hoki te whakamana i ō mātou tāngata kia whai wāhi mai ki tēnei kaupapa nui mō tēnnei whakatipuranga ki te whakahou i te ako ahumahinga.” tana kī.
E whakaatu mai ana ngā hua i te kaha hiahia o ngā kaimahi kia mōhio he aha te pānga mai o te whakaumutanga nei ki a rātou tonu, ā, me pēhea hoki tā rātou whai koha kia tautoko i ngā panoni, me pēhea hoki tā mātou tautoko i a rātou i runga i aua panoni anō.
I kī a Stephen i whakaae ngā kaiarataki a Te Pūkenga ki ngā mahi e toru i muri i te putanga o ngā hua uiuinga.
- Kia hanga i tētahi anga mō tētahi kaupapa oranga ā-kōtuinga me tētahi rōpū mai i te kōtuinga
- Kia whakarite i tētahi kaupapa e tautoko ana i te whakaaro “mā mātou tonu e ārahi i a mātou anō me ētahi atu mā ēnei panoni”
- Kia tuku kōrero tonu hei whakatairanga i te māramatanga ki ngā panoni me te mahere whakaanga, me ngā rārangi wā hoki.
“E mōhio ana mātou kei te rāpu māramatanga ngā tāngata mō te āhua o te ao o āpōpō. Kei ngā hua o te Aromātai Kaimahi e kitea ana, me ngā toronga o taku tīma ki ngā āpitihanga mō te kaupapa o Kōtui Kōrero – he whakawhiti kōrero me Te Pūkenga.
Kei te hiahia mātou kia āwhina mai ngā tāngata o te rāngai nei, me kī, o tā mātou kōtuinga, ki te hoahoa i te āhua o te ao o āpōpō kia kaua e tūpono noa te angitu – mō ngā ākonga, ō rātou whānau, ngā kaitukumahi me ngā tāngata katoa o Aotearoa.
“Nā reira, kia tōtika te hanga o tā mātou tauira whakahaere, mā te whakawhiti kōrero, te hoahoa-ngātahi, te mahitahi me te rāngai, a ngāi Māori, ngā ākonga me ngā whānau, ngā kaitukumahi, ngā rohe, hapori hoki.
E kore pea e mārama ngā mahi mō tētahi wā – kei te mōhio hoki au he mea uaua tērā, nā reira ka whakarite huarahi mātou kia pai ake te tautoko i ngā whānau puta noa i te kōtuinga, me te toro atu ki ngā mātauranga kei tā mātou kōtuinga.”
Ka whakarite huarahi anō a Te Pūkenga kia whānui tonu te whakawhiti kōrero me te rapu whakaaro mō te tauira whakahaere ā te marama o Mahuru 2021. Kātahi ka haere te tono me te mahere whakatinanatanga ki te Minita i mua i te mutunga o te tau. Whai muri i te whakaaetanga a te Minita ko te whakarite i ngā mahi me hanganga whakahaere.
I kōrero hoki a Stephen mō te huhua o ngā rōpū mahitahi kōtuinga, ngā ohu me ngā hui awheawhe nāna i whakakao mai ngā kaimahi i ngā āpitihanga me ngā Whakahaere Whakangungu Ahumahi Whakawhitinga (ngā TITO) kia mahitahi.
“E kite ana mātou i te hiahia o ngā tāngata ki te kōrero mō ā rātou mahi i whai hua, te whakataurite hoki i ngā mahi pai rawa me te mahitahi kia anga whakamua. He oranga ngākau te kite i kaha puta ake tēnei i ngā hua o te Aromātai Kaimahi, hei tohu hoki i te whai wāhi mai o ngā tāngata ki tēnei kaupapa.
Ka whai a Te Pūkenga kia haere tonu ngā Aromātai Kaimahi, ā, ka tū te uiui ā muri atu nei ā te marama o Whiringa-ā-rangi 2021. Ka whai wāhi hoki ngā Whakahaere Whakangungu Ahumahi Whakawhitinga (ngā TITO) kua whakawhiti mai ki Te Pūkenga Work Based Learning Ltd, ki taua uiuinga.