Kotahi marama noa iho te roa mō Stephen ki te tūranga hou me tana tīma iti o te tari matua, ā, e pono ana ia kei te haere whakamua ngā mahi. Akōakenei ka tukua e NZIST ngā RFP e toru hei rapu hoa hei waihanga tauira whakahaere, he rautaki whakahaere hautaonga, hei waihanga hoki i tētahi mahere rautaki pūnaha pārongo, kua mārō tonu te haere kia rerekē te āhua o ngā tikanga mahi.
“Ko taku aronga matua, i a mātou e waihanga nei i te pūnaha mātauranga ahumahinga whakahonohono, kotahi, mauroa hoki, he mātua whai kia noho ko ngā ākonga te pūtake o ā mātou mahi katoa. He mea whai tikanga te angitu o te ākonga ki te angitu o NZIST e haere ake nei me Aotearoa hoki. Me waihanga e mātou ngā huarahi auaha, urutau hoki hei whakarato akoranga, mō ngā ākonga o nāianei, o āpōpō hoki,” ki tā Stephen.
E whakaae ana a Stephen he nui te ongaonga me te manako puta noa i te rāngai i runga i te āhua o te wero me te huarahi e tuwhera mai ana ki te anamata o te mātauranga ahumahinga me ōna hua hei painga mō Aotearoa.
“He kaupapa nui, he panoni nui hei mea kakari mā mātou, e noho ana i te taha o te kaupapa panoni whānui o RoVE. He mea matatini, he mea manganga, whakahārangi hoki pea i ētahi wā ngā mahi whakaumu a NZIST. Ko taku mahi he whai kia iti noa te manganga me te hārangi, engari kia nui te mārama, kia rite tēnei kaupapa ki te waka eke noa mō ngā tāngata katoa. Mā tēnā e noho tonu ai ko ngā ākonga te pūtake o ā mātou mahi katoa.
Ka haere ngā mahi whakaumu a NZIST mō ngā tau e rua me te hāwhe. Nā, me whakarato tonu e te kōtuinga te mātauranga me te whakangungu tino kounga, i te wā e whakaritea ana te tauira whakahaere wā-roa i te taha o ngā whakahaerenga o nāianei hei waihanga i tētahi kōtuinga mauroa ā-motu hei tuku mātauranga ahumahinga me te whakangungu e taea ana ahakoa ko hea te rohe, e hāngai ana ki ngā hiahia o ngā ākonga, ngā ahumahi, ngā kaitukumahi me ngā hapori i ngā rohe katoa o Aotearoa.
Kei te whakaoti haere a Stehen me te Heamana Kaunihera NZIST Murray Strong i ngā tikanga kimi i ngā tangata tokoono hei Kaiwhakahaere Mātāmua Tuarua. Kei te haere ngā mahi hei whakatau i te wāhi mō te Tari Matua NZIST ki Kirikiriroa. Hei te wiki tuatahi o Akuhata Ka huitahi rāua me ngā CEO ITO Whakawhiti, kātahi ka toro haere i ngā āpitihanga NZIST 16. Ko te whai wāhi rāua ki te kōrero me ngā kaimahi, ngā ākonga, ngā mema poari me ngā kaiwhaipānga o tēnā rohe, o tēnā rohe ina ka taea.