E kopoua ana e te Poari Mātāmua o New Zealand Institute of Skills and Technology Establishment Board (te Poari Mātāmua) ngā kaiwhakahaere mō ngā poari o ngā Pūtahi Āpitihanga, Kuratini hoki (ITP), ā, nō te 1 Paengawhāwhā 2020 i mana ai.
Kua whakaae mai ngā tāngata e whai ake nei kia noho hei kaiwhakahere mō te poari o UCOL mai i 1 Paengawhāwhā 2020:
Catherine Cooney – Heamana
Ripeka Evans (Ngāpuhi, Ngāti Porou, Te Aupōuri, Ngāti Kahu) – Heamana Tuarua
Leith Comer (Ngāi Tahu, Ngāti Māmoe, Te Arawa, Ngāti Rangitihi, Ngāti Pāhauwera)
Ngaroma Tahana (Te Arawa)
“Ko te kopounga o tēnei o ngā Poari Kaiwhakahaere tētahi o ngā mahi nui hei wāihanga i tētahi pūnaha ahumahinga piritahi, mauroa hoki,” ki tā Barry Jordan, te Heamana o te Poari Mātāmua.
“Ko te korounga ia mā ēnei kopounga e taurite ai te taha whakahaere me te taha ki ngā hononga taketake ā-rohe, ā hapori hoki. E manawareka ana mātou i te momo o te tangata me ngā tirohanga rerekē kei ia poari, otirā ngā pūkenga me ngā tautōhito hei whakatinana i ngā hua pai mō ōna hapori, mō ōna hapori.”
Ko te hiahia o te Education (Vocational Education and Training Reform) Amendment Act ko te iti rawa kia tokowhā, engari kia kaua e nui atu i te tokowaru ngā kaiwhakahaere mō te poari tuatahi o ia āpitihanga ITP, ā, ko tētahi haurua o aua kaiwhakahaere me mātua noho ki roto i te rohe e ratoa ana e taua āpitihanga.
I kī a Cathy Cooney te Heamana Poari o Toi Ohomai Pūtahi Hangarau, “I Toi Ohomai, e ngākaunui ana mātou ki te hāpai ā mātou ākonga ā-rohe, ki tuawhenua hoki, kia angitu hoki ngā Māori i roto i ērā wāhi. Kua whakapau kaha mātou ki tā mātou whakahoatanga ki a ngāi Māori me ngā iwi, ā, e tino hiahia ana mātou kia kaha tonu te piki haere, me te tautoko i ērā kaituku akoranga huri noa te motu ki te whakarite whakahoatanga pai ake, mahitahi me ngāi Māori me ngā iwi.
“Ka awhi mātou i ngā whakahoutanga ki te mātauranga ahumahinga me te arotahi tonu ki te whai kia pai ake ngā hua mō ngā ākonga, ngā iwi, hapū, ngā ahumahi me te rohe whānui.
Hei ārahi haere i te nekehanga atu i te wairua o te whakataetae ki te āhua o te kōtuituinga tuku ratonga ki tēnā, ki tēnā rohe, kua whakataungia e te Poari Whakapūmau kia noho tētahi mema o Kaunihera NZIST hei kaiwhakahaere ki ia poari āpitihanga ITP. Tērā e whiwhi ia poari tētahi tangata hei ‘kopounga poari-rua’. Ka whakataungia ēnei ingoa i te marama o Paengawhāwhā.
Mō te kōpou kaiwhakahaere i whai te Poari Whakapūmau i tā te Treasury anga kopounga kaiwhakahaere ki ngā poari o ngā kamupene Karauna. Neke atu i te 370 ngā tono i tae mai i waenga i te wā o te Kirihimete me te huringa o te Tau Hou.
Katoa ngā kopounga ki ngā poari āpitihanga i whakamanahia e te kaunihera NZIST i te 1 Paengawhāwhā 2020. Ka whakamanahia ngā mema o tēnei Kaunihera e te Minita Mātauranga, Hon Chris Hipkins, i mua i te mutunga o Poutūterangi.
Catherine (Cathy) Cooney – Heamana
JP, RGON, RM, BA (Hons), FACHSM, FNZIHM, FCNA(NZ), MInstD
Kua noho a Catherine hei Heamana o Toi Ohomai Pūtahi Hangarau e toro ana ki te Moana-a-Toi me Waikato ki te Tonga mai i 2016. E kaingākau ana ia ki te hāpai i ngā ākonga kia pūāwai ngā pūmanawa me te wāhi ki te mātauranga ahumahinga hei kawe whakamua i te whanaketanga pāpori, ahurea, ōhanga hoki o te rohe whānui.
Kua roa a Catherine e mahi ana i ngā tūranga kaitiakitanga, kaiārahi rāngai hauora, whanaketanga ā-hapori, i te taha ki ngā nēhi, kaiwhakawhānau pēpi hoki. Ko ia te Kaiwhakahaere Mātāmua o Lakes DHB mai 2001 ki 2012, ā, mai i tērā wā kua noho ia hei kaitohutohu whakahaere e kawe ana i ngā tūranga kaitiakitanga, tohutohu ā-motu hoki.
Ripeka Evans – Heamana Tuarua
Kua noho a Ripeka (Ngāpuhi, Ngāti Porou, Te Aupōuri, Ngāti Kahu) hei kaiwhakahaere, hei Heamana, Kaiwhakahaere Mātāmua, hei kaitohutohu rautaki hoki. Kei Te Whanganui a Tara ia e noho ana, ā, he kaitohutohu ia e arotahi ana ki ngā whakahoatanga Tiriti me te whanaketanga ōhanga.
I tīmata a Ripeka i runga i tana ara mahi i te Māori Economic Development Commission, ā, i Television New Zealand i muri. Kua noho hoki ia hei Kaiwhakahaere Mātāmua ki Te Māngai Pāho, ki Toi Eastern Bay of Plenty Economic Development Agency hoki, me ētahi tūranga kaiwhakahaere, tarati hoki ki Te Aupōuri Fisheries Limited me Te Rūnanganui o Te Aupōuri. He mema hoki ia o te Komiti Rautaki Te Ao Māori o te Pūtea Matua o Aotearoa.
Leith Comer
Kei Rotorua a Leith (Ngāi Tahu, Ngāti Māmoe, Te Arawa, Ngāti Rangitihi, Ngāti Pāhauwera) rāua ko tana hoa rangatira e noho ana. Kei te kawe ia i ētahi tūranga kopounga hapori pērā i te heamana o Te Mana o Ngāti Rangitihi Trust, takawaenga matua mō ngā whakataunga tiriti o tana iwi, heamana o te Karapu Haupōro o Rotorua, heamana hoki o te Veterans Advisory Board me Ngāti Pumanawa Waru Education Trust.
He mema o mua a Leith o te New Zealand Parole Board, he heamana o mua hoki o Lakeland Health Limited. I mahi hoki ia i ngā tari kāwanatanga i Te Whanganui a Tara, mō ngā tau e toru hei Hekeretari Tuarua i te Ministry of Economic Development, whai muri atu i tērā 12 tau hei Kaiwhakahaere Mātāmua i Te Puni Kōkiri.
Ko te mahi tuatahi o Leith i te New Zealand Army hei āpiha hōia haere raro, ko ia te ngārahu o te 2nd/1st Hokowhitu Haere Raro. Ko ia anō te ngārahu puni hoia o te ope hohou rongo rongomau i Sinai, he āpiha whakawhiti hoki ki te Ope Taua o Amerika. I tae atu ia ki te Kāreti o United States Army, ā, i ingoatia mō āna mahi pai, ka whakawhiwhia hoki ki te Eisenhower Award.
Ngaroma Tahana
Raranga te hau ki te muri
Raranga te hau ki te tonga
Kia mākinakina i uta
Kia mātaratara i tai
Kia whakapuke ai ngā ngaru o Te Ngarue
Ko ngā pōtiki a Hinehopu e heru mai rā i Te Mātārae i o Rehu
Tihei Mauri Ora!
He uri ahau o Ngāti Pikiao ko Tapuika hoki.
He hoa whakahaere a Ngaroma i Kahui Legal, tētahi umanga ture Māori kei Rotorua kei Te Whanganui a Tara hoki. He rōia matua ia, ā, neke atu i te 15 tau ia e mahi ana i roto i te ao ture, mahi kaitiaki hoki. Kua mahi kē ia i ngā wāhanga katoa o te hāmene taihara, hāmene kiri tangata ina koa ko te toihara taumaha tāna tino aronga. E tino kaingākau ana ia ki te mātauranga hei waka whakatipu tangata, hapori hoki. Ko ia hoki tētahi kopounga ā-Minita ki ngā kaunihera mō Toi Ohomai Pūtahi Hangarau, o Waiariki Pūtahi Hangarau hoki.