Ka whakamihi a NZIST i tā te Kāwanatanga kete Ringarehe me te Whakangungu $1.6 piriona i pānuitia i te rā nei hei wāhanga o te Tahua 2020.
“Tūturu, he mea tino whaitake te putanga mai o tētahi kete pēnei rawa te nui. Arā kē ngā painga ka puta i te tuku tautoko koreutu mō ngā ringarehe me te whakangungu mō ngā tāngata o Aotearoa mō te ōhanga hoki e tahuri ana ki te huarahi whakapiki oranga.” Te kī a Murray Strong Heamana Kaunihera NZIST.
“He tokomaha tonu ngā tāngata o Aotearoa e pēhia nei e te koremahi me ngā whiu pāpori, ōhanga hoki a te urutā Covid-19, ā, tērā tonu pea ka nui haere ēnei āhuatanga i te roanga atu o te tau nei.
“He wā tēnei kia whakaaro anō ngā tāngata ki ngā huarahi hei whai mā rātou, ā, ka tahuri ki te whai pūkenga hou. Mā tēnei tautoko nui mai i te Kāwanatanga e taea ai rātou ki te hoki wawe ki te ohumahi ki ētahi wāhi hou, wāhi whakaongaonga hoki. I Aotearoa e whaiwhakaaro ana ki te tipu o te ōhanga ā ngā tau kei tua, ko te tūmanako ia he wāhanga hou tēnei mō ngā ākonga, ngā pakihi me ngā whānau puta noa i Aotearoa.”
“I te taha o te Whakahoutanga o te Mātauranga Ahumahinga, te whakatūranga o te NZIST me ā mātou āpitihanga me ngā kōtuinga Whakahaere Whakangungu Ahumahi Tauwhirowhiro, ko tēnei tētahi huarahi e tūhonohono tonu ai a Aotearoa, ā tātou ākonga, kaitukumahi hoki,” te kī a Mr Strong.
E tino mihi ana mātou ki te haumi e whakawhānuitia ai He Poutama Rangatahi, ā, mā te Pūtea Piatanga Māori pea e turaki ngā tauārai e aukati ana i ngā rangatahi Māori me tā rātou whai wāhi ki te mātauranga ahumahinga kia ahu atu tātou ki te ōritetanga mō ngā ākonga katoa i Aotearoa.”
“Kua rite te NZIST ki te whakahāngai tika i te kete mātauranga matua a te Kāwanatanga huri noa te motu. Ka mahi ngātahi mātou me ā mātou āpitihanga, me ngā Whakahaere Ringarehe, Whakangungu hoki kia kawea tēnei mahi kia pai anō mō ngā ākonga me ngā kaitukumahi,” tana kī.