E kopoua ana e te Poari Mātāmua o New Zealand Institute of Skills and Technology Establishment Board (te Poari Mātāmua) ngā kaiwhakahaere mō ngā poari o ngā Pūtahi Āpitihanga, Kuratini hoki (ITP), ā, nō te 1 Paengawhāwhā 2020 i mana ai.
Kua whakaae mai ngā tāngata e whai ake nei kia noho hei kaiwhakahere mō te poari o UCOL mai i 1 Paengawhāwhā 2020:
Niwa Nuri (Te Arawa) – Heamana
Michael Crawford
Margaret Devlin
Kiri Goulter
Raewyn Mahara (Waikato Ngāti Mahuta; Te Āti Awa, Otaraua; Taranaki, Ngāti Moeahu)
Pamela Storey
“Ko te kopounga o tēnei o ngā Poari Kaiwhakahaere tētahi o ngā mahi nui hei wāihanga i tētahi pūnaha ahumahinga piritahi, mauroa hoki,” ki tā Barry Jordan, te Heamana o te Poari Mātāmua.
“Ko te korounga ia mā ēnei kopounga e taurite ai te taha whakahaere me te taha ki ngā hononga taketake ā-rohe, ā hapori hoki. E manawareka ana mātou i te momo o te tangata me ngā tirohanga rerekē kei ia poari, otirā ngā pūkenga me ngā tautōhito hei whakatinana i ngā hua pai mō ōna hapori, mō ōna hapori.”
Ko te hiahia o te Education (Vocational Education and Training Reform) Amendment Act ko te iti rawa kia tokowhā, engari kia kaua e nui atu i te tokowaru ngā kaiwhakahaere mō te poari tuatahi o ia āpitihanga ITP, ā, ko tētahi haurua o aua kaiwhakahaere me mātua noho ki roto i te rohe e ratoa ana e taua āpitihanga.
Hei tā Niwa Nuri te Heamana o te Poari o Wintec, “Nōku kē te hōnore kia noho hei Hemana o te poari hou, ā, e anga whakamua ana au kia whai wāhi tonu ki tēnei haerenga. Kei ēnei whakahoutanga tētāhi huarahi e whakaaro hou ai me ētahi atu puta noa i te kōtuituinga kia kawea ake e tātou te mānuka nei hei whakarite i te korenga o te whiwhinga ōrite o ngāi Māori, o ngāi Pasifika hoki.
E tino kaingākau ana au kia tika ngā whakawhiti kōrero me ngā kaitukumahi e mātua whakarite ai ā tātou ākonga mō te mahi, kia whaihua hoki ngā whakangungutanga ka tukua ki a rātou kia whaikoha ai rātou ki ngā hapori tū kaha, ngangahau hoki.
Hei ārahi haere i te nekehanga atu i te wairua o te whakataetae ki te āhua o te kōtuituinga tuku ratonga ki tēnā, ki tēnā rohe, kua whakataungia e te Poari Whakapūmau kia noho tētahi mema o Kaunihera NZIST hei kaiwhakahaere ki ia poari āpitihanga ITP. Tērā e whiwhi ia poari tētahi tangata hei ‘kopounga poari-rua’. Ka whakataungia ēnei ingoa i te marama o Paengawhāwhā.
Mō te kopou kaiwhakahaere i whai te Poari Whakapūmau i tā te Treasury anga kopounga kaiwhakahaere ki ngā poari o ngā kamupene Karauna. Neke atu i te 370 ngā tono i tae mai i waenga i te wā o te Kirihimete me te huringa o te Tau Hou.
Katoa ngā kopounga ki ngā poari āpitihanga i whakamanahia e te kaunihera NZIST i te 1 Paengawhāwhā 2020. Ka whakamanahia ngā mema o tēnei Kaunihera e te Minita Mātauranga, Hon Chris Hipkins, i mua i te mutunga o Poutūterangi.
Niwa Nuri – Heamana
I kopoungia a Niwa hei mema o te Kaunihera o Wintec i 2017, hei Heamana Tuarua hoki i 2018.
He mea pōti ia hei mema o Te Arawa Lakes Trust, ā, i tēnei wā ko ia te heamana o te Komiti Tiaki Pūtea me Te Tūpono o te Raru ka Pā mai, he mema hoki ia o te Poari o te Kura Tuatahi o Rototuna, he pūkenga hoki ia o ngā Kaitiaki Kaute Whaimana o Ahitereira me Aotearoa.
Kua whai Tohu Paetahi mō ngā Akoranga Whakahaeretanga mai i te Whare Wānanga o Waikato, ā, koia hoki te heamana o mua o Trust Waikato. E tino kaingākau ana a Niwa kia whai koha ki te Waikato Institute of Technology Limited, kia waihanga hoki i tētahi wāhi mātauranga ahumahinga, whakangungu hoki e wātea ana ki te rohe whānui.
Michael Crawford
He kaiwhakahaere ngaio a Michael kei Waikato e noho ana, e mahi ana i runga i ngā kaupapa o te inihua, te hauora, te whakarite wāhi noho me te haumi. Ko āna tūranga kaiwhakahaere kei te ringa haumi o Wairoa Iwi, me Tātau Tātau o Te Wairoa Commercial Limited, ā, koia hoki te heamana o te poari o Frank Risk New Zealand Limited, he kamupene takawaenga inihua, ārai whatitata hoki.
Inā te whānui o ōna pūkenga pērā i te whakawhanake me te whakatinana i te rautaki, te whakahaere panoni, te tiaki pūtea me te ārai whatitata. Nā āna mahi pakihi mō ngā tau 30 neke atu, kua tino matatau ia ki ngā ara whakaputa hua pai mō te hunga whaipānga me ngā kiritaki, ngā rāngatira pakihi, ngā kaimahi, ngā iwi me te hapori hoki.
He Kaiwhakahaere Whai Mana, he Kaitiaki Kaute Whai Mana a Michael, ā, he Poutoko Ture hoki.
Margaret Devlin
He kaiwhakahaere kamupene motuhake, tautōhito hoki a Margaret, ko te nuinga o āna mahi kei ngā rāngai hanganga, ratonga hoki puta noa i Aotearoa. Ko ana tūranga kaiwhakahaere ko te Heamana Watercare, Lyttleton Port me Women in Infrastructure, tētahi kōtuituinga i whakatūria ai hei whakapai ake i te rerekētanga me te whai wāhitanga i roto i te rāngai hanganga.
He kaiwhakahaere hoki ia o Hamilton Airport, MetService New Zealand, Aurora Networks, Infrastructure New Zealand me IT Partners. Ko Margaret hoki te Heamana motuhake o te Komiti Tātari Kaute me te Whatitata. He Pūkenga Whai Mana ia hoki o te Institute of Directors. E kaingākau ana a Margaret ki te mahi tahi me ngā pakihi kia whai hua mauroa e aronui ana ki te Tangata, te Ao, me te Painga. Kei Kirikiriroa ia e noho ana.
Kiri Goulter
Neke atu i te 20 tau a Kiri e mahi ana i ngā rāngai tāpoi me te whanaketanga ōhanga. Mō ngā tau e whitu, ko ia te Kaiwhakahaere Mātāmua o Hamilton & Waikato Tourism, ā, he kaiwhakahaere hoki ia i Tourism New Zealand me Enterprise Northland.
Ko Kiri te Heamana Tuarua o te Waikato Regional Economic Development Agency Te Waka, he Tarahiti o Te Awa Cycle Trail, ā, kua noho hoki ia hei mema o te Kaunihera o Wintec mai i Haratua 2018. He kaiako hoki a Kiri i mua, ā, kua whai Pōkairua Tāura mō te Whanaketanga Ohaoha, he mema hoki ia o te Institute of Directors.
Kei a Kiri anō tāna ake kamupene kaitohutohu, ā, i tēnei wā koia tērā e ārahi ana te kaupapa whakahaere me te whakamahere wāhi haere a Hīkina Whakatutuki (Ministry of Business, Innovation and Employment).
Raewyn Mahara
Waikato, Ngāti Mahuta. Te Ati Awa, Otaraua, Manukorihi. Taranaki, Ngāti Moeahu
B.Ed, MBA – Te Whare Wānanga o Waikato
He kaitaunaki ngākaunui a Raewyn mō te hāpai i te tirohanga ā-iwi puta noa i te rāngai mātauranga. Hei Kaiwhakahaere Matua mō Education and Pathways ki Waikato-Tainui, kua riro māna e ārahi te whanaketanga me te whakaritenga o te Mahere Mātauranga o Waikato-Tainui Education Plan mō ngā tau e whitu kua hipa ake.
Mā rātou ko tana tīma e whakahaere ngā hononga whānui me ngā hapū, iwi kē, kaituku akoranga, tari kāwanatanga, kaitukumahi me ngā hoa ahumahi. Neke atu i te rua tekau tau ia e mahi ana i roto i te rāngai mātauranga, ā, e noho ana a Raewyn ki ngā pae tohutohu a Te Tāhuhu o te Mātauranga hei whakaatu i tā te iwi ake tirohanga ki te whakaumu i te mātauranga mō ngā ākonga Māori.
Pamela Storey
I tēnei wā he Kaiwhakahaere a Pamela ki te Rōpū Whakangungu Ahuwhenua Ahumahi (Primary ITO), he Kaikaunihera ā-Rohe ā-pōti i te Waikato Regional Council (WRC) me te Heamana o te Komiti Rautaki, Kaupapa Here o WRC, he Tarahiti o te Dairy Women’s Network, te Heamana o te Upper North Island Client Council for Rabobank, me te Heamana Tuarua o The Good Collective.
He kaiwhakatipu kai whakahīhī, he kaipāmu miraka kau hoki ia i te taha raki o Waikato, ā, e hia kē ngā tūranga kaiwhakahaere kua kawea e ia i nga rāngai pērā i te mātauranga, te pūngao, te taiao, te manaaki hauora me te ahumahi ahuwhenua. Kua whai a Pamela i te tohu paetahi mō Electrical Engineering mai i Washington State University (USA) me te MBA mai i University of Reading (UK).