E mahitahi ana te tīma hoahoa-ngātahi tauira whakahaere me ō mātou hoa EY me EY Tahi kia whai wāhi mai te whānuitanga o ngā reo kia urupare atu ki te wero nui rawa kei mua i Te Pūkenga mō tēnei tau, arā, kia pohewa anō i te whakaakohia o te mātauranga ahumahinga.
Ka piritahi tonu te tīma hoahoa-ngātahi, ka mahitahi ai i roto i ngā marama e rua kei te tū mai i runga tukanga whai whakaaro hoahoa (pānuihia ngā kōrero mō tēnei kaupapa). Mai i tēnei mahi ka whanake ko te ariā tuatahi o te hoahoanga tauira whakahaere ratonga anamata. Mā te whai wāhi mai o te whānuitanga o ngā reo ki te tīma hoahoa-ngātahi e mātua whakarite kia noho tonu te hunga ka pāngia rawatia e ngā putanga ki roto i ngā wānanga, ngā whakamātauranga me ngā whakatau.
E 37 ngā mema o te tīma hoahoa-ngātahi nei mai i tōpito katoa o te motu. Arā,
- 16 ākonga he rerekē ngā tau, he rerekē ngā pūmanawa, ko ētahi he tāura nō ngā tau tata nei, tekau tāngata kei kanohi ā-rangai, e rima ngā kaitukumahi me ngā tokoono hei māngai ā-hapori, ā-iwi hoki
- Te whānuitanga o ngā iwitanga, arā, 19 ngā tāngata Māori, tokowhā ngā tāngata Pasifika
- Arā hoki ētahi he hunga whaikaha ā-tinana, ā-ako hoki, me te tokotoru he nui tonu ō rātou hauātanga whaiaro.
“Ki au nei, i kaha tonu mātou ki te whakahuihui mai i ēnei tāngata hei rōpū tāngata pūmanawa, kanorau hoki mō tā mātou tīma hoahoa-ngātahi,” te kī a Merran Davis, Te Pūkenga Kaiwhakahaere Mātāmuri mō te Whakaumutanga me te Whakawhitinga, ā, ko ia hoki te kaihāpai o tēnei kaupapa hoahoa-ngātahi.
“Ka nui te kaha o tā mātou wānanga tuatahi – kanohi-ki-te-kanohi i Te Whanganui a Tara. Ka tūtakitaki, ka whakahoahoa, ka whakaratarata, ā, ka tokona te kohara me te ngākau nui o ngā tāngata o te rōpū me te kotahi o te whakaaro mā tēnei mahi e tautuhia anōtia te mātauranga ahumahinga i Aotearoa.
I arotahi te wānanga tuarua ki te whakamātau me te whakaū i ngā tauākī matua i puta mai i ngā mahi rangahau me ngā kōrero urupare i whakakaongia i ngā marama tata nei. Ka whāiti mai ko ngā rangahau hōhonu mō te kaupapa o Ko te Ākonga te Pūtake i whakahaeretia i te hiku o 2020. Mā ngā tauākī matua e mātua arotahi mātou ki ngā rerekētanga e pai ake ai ngā wheako a ngā ākonga me ngā kaitukumahi me te kōkiri haere i te tukanga whakaputa whakaaro.”
“He mea whakamīharo ki au te tauira hoahoa-ngātahi a Te Pūkenga nā tana whakaū i Te Tiriti o Waitangi me te kanorau o ngā ākonga kei ā tātou Kuratini,” te kī mai a tētahi i tae atu ki te wānanga.
“Ka aroha hoki mō te maha rawa o ngā ākonga Māori me ngā ākonga kanorau kāore puta te ihu i te korenga i aro nui atu mātou ki a rātou anō me ngā huarahi ako e paingia ana e rātou.
E hiamo ana te ngākau ki tēnei huarahi kei mua i a tātou, ki te waihanga i tētahi ao hou, i ētahi tikanga hou. Koia anō rā, he pāpā au ki aku kōtiro e rua, he ākonga Māori anō ahau.
Ka kawea marikohia te nuinga o ngā mahi a te tīma hoahoa-ngātahi, heoi, e toru atu anō ngā wānanga i mua i te mutunga o Mei 2021.
Hei pohewa anō i te mātauranga ahumahinga, ka whakaritea kia whānui tonu te rapu whakaaro mai hei whakamātau, hei whakaū hoki i ngā huarahi hoahoa e whakawhanakehia ana. Atu i ngā wiki mātāmua o Maehe ka haere ngā tono a te rōpū tauira whakahaere ki ētahi tāngata kia uru mai ki tētahi rōpū tohutohu, kia whaikoha hoki ki te matapakitanga tuihono.
Ka tuwhera atu te huarahi ki te whānuitanga o ngā rōpū ā-roto o tēnei wā, pērā i ngā kaimahi kōtuinga, ngā mema Poari, ngā uniana me ngā ākonga kei roto i te pūnaha i tēnei wā, tae atu hoki ki ngā rōpū ā-waho pērā i ngā kaitukumahi, ngā kaitohutohu ara mahi me ētahi atu tāngata e tautoko ana i ngā ākonga, arā, ngā mātanga kaupapa ako kei ngā rōpū mātauranga me te huhua o ngā rōpū hapori.
Hei ngā wiki mātāmua o Maehe ka tuaringia e mātou ngā taipitopito kia hono mai koe ki te tuku whakaaro mai, tuku wheako mai hoki i runga i tēnei mahi waihanga tauira whakahaere.