Ko taku reo taku ohooho, ko taku reo taku mapihi mauria
My language is my awakening, my language is the window to my soul
Ko Janell tēnei i roto i tēnei whakaahua (nā Jeremy Bryson te whakaahua - UCOL)
Ko te wiki kei te tū mai koia te Wiki o te Reo Māori, ā, koirā tā mātou puta noa i NZIST, he whakanui i tēnei kaupapa. Kei tēnā, kei tēnā o ā mātou āpitihanga he mahi hei hāpai i te reo Māori i roto i ngā hapori: hei tautoko hoki i te hunga e noho tauhou nei ki te reo, tae atu ki te hunga ko te reo Māori te reo ūkaipō.
Mō mātou o NZIST, he wā tēnei hei whakaaro iho, ā, kia ngākau nui tonu ki te whai i te whiwhi ōrite mō ngāi Māori, kia ū tonu ngā mātāpono o Te Tiriti o Waitangi.
Ahakoa kei te kūao tonu mātou, kei tā mātou paetukutuku e kitea ana te āhua o tō mātou tautoko – arā, kei ngā reo e rua, reo Pākehā, reo Māori ngā kōrero katoa.
Tēnei mātou e whakahau nei i ngā tāngata katoa kia tahuri ki te tautoko i Te Wiki o te Reo Māori – me te tuku ingoa ki te kaupapa ‘ko koe tētahi o te miriona’ e kōrero ana, e waiata ana, e whakanui ana hoki i te wā kotahi, i tētahi Wā Tuku Reo Māori i te rā poupou ā te Mane 14 o Mahuru.
Kua kawea e ngā āpitihanga NZIST ētahi kaupapa hei whakanui, hei whakamihi hoki i te Wiki o te reo Māori.
Ko tā EIT mahi i ēnei wiki e rua ka hori he mahitahi me ngā tauira Māori, pūkenga Māori hoki ki te hanga ataata hei whakaatu i te ara ako i te reo i whāia e tēnā, e tēnā. Ka tuaringia tētahi o ngā ataata i ia rā o Te Wiki o te Reo Māori i runga i tā EIT whārangi Pukamata .
Kei te tuku tonu a UCOL i āna akoranga reo Māori e ngākautia ana.
I te Mane 14 o Hepetema, hei kaupapa ōrua ki Te Wā Tuku Reo Māori, i whakahaere a Janell Kiriona o UCOL tētahi hui Korikori Tinana i tā te āpitihanga kura ki Manawatū. He kaiārahi whakaakoranga, he pūkenga matua hoki a Janell mō te Kori Tinana & Te Hauora, ā, he Kaiako Te Atakura hoki.
Ko tētahi o ngā kaupapa whakahirahira o te wiki nei mō UCOL ko te whakarewa i tētahi whakataukī hou, he mea tuhi nā Matua Mike Kawana, ā, he mea hono ki ngā tīpuna rongonui o Wairarapa.
Ka noho te whakataukī hei pūtake mō tētahi mahi toi mā ngā tauira – ka whakamahia e rātou he kāri pinex ka tuhi ai tō rātou tino whakataukī ki runga. Hei te mutunga o te wiki, ka whakakao mai te kāri ka meatia hei pātū whakaata 2020.
Inā te kaha ngākaunui o NZIST me ōna āpitihanga 16 ki te Tiriti o Waitangi me tana mōhio hoki kia kaua e waiho kia kotahi noa te wiki hei whakarauora mai i te reo Māori. Tērā he mahi whakahirahira e haere ana puta noa i te kōtuinga kia noho tangata whenua ai ētahi rautaki, anga, tikanga mahi hoki e mātua whakarite i te aronga kaha, aronga mauroa e tutuki ai te whiwhi ōrite mō ngā ākonga Māori.